秒速0.25

疫情期間可謂三步不出閨門嘅我，早兩日不得已要出門一趟。途經鐵路站嘅時候，有一個廣告引起咗我注意……

 

某疑似偽德國品牌嘅自動泡沫洗手機，賣點係0.25秒速……秒速喎，但係無咗距離單位嗰部分嘅？

講到秒速，相信唔少人會諗起新海誠嘅《秒速五厘米》（係啩？）。戲名所指嘅，據聞係櫻花瓣跌落蒞嘅速度（不過又據聞有日本某博士證明咗唔係）。呢部機賣快，咁無理由喺秒速0.25厘米咁慢啩？

氣象學上，都好常用「米每秒」呢個速度單位，例如中國、日本、台灣等地嘅氣象部門，都會用呢個單位蒞報告熱帶氣旋嘅風速。秒速0.25米，即係每小時0.9公里，查下蒲福氏風級，係屬於0級風，即係等於無風，海平如鏡，煙直向上……咁又有幾快呀？

莫非係秒速0.25公里⁉即係時速900公里，一般民航機嘅巡航速度喎！咁就真係快嘞！不過屋企有部會將啲泡以每小時900公里嘅速度噴出蒞嘅機，即係好似一把氣槍咁，唔係幾安全喎……

睇返有關產品嘅介紹，原來係話呢部機用0.25秒就可以自動唧到啲泡出蒞。咁擺明就係亂用「秒速」呢個詞啦！咁都算嘞，我再喺網上高求其摷下，發覺識得0.25秒出泡嘅洗手機周圍都係（例如呢度、呢度、呢度同呢度），真係擺明呃無知婦孺……

係呢，我離開鐵路站嗰陣，見到呢兩個廣告放埋一齊……車站係咪驚人會嘔泡呢？