Online News Typo 20160926

每秒21公里…即係音速嘅超過61倍！好似話飛機如果以超過8馬赫嘅速度飛行，表面溫度可以高達3000℃。一團空氣以61馬赫嘅速度喺地表行進，超過3000℃應該都唔出奇，咁所到之處應該會變哂做煉獄！

又話說當時個風距離花蓮490公里，即係話個風喺23秒之後就登陸／摧毁花蓮…嗯，出呢條新聞嘅人打字都打得好快喎！

仲有就係，秒速21公里，已經超越咗第三宇宙速度，足夠由地球表面起步脫離太陽系！所以台灣今次避過一劫嘅原因，應該係呢個3000℃嘅風喺嗰23秒之內已經浮起咗並且喺接近台灣之前擺脫咗地球引力衝上太空，喺行星際空間消散…好彩！天佑台灣！

Online News Typo 20160921

列車內的廣州播，即係淨係播廣州話？連英文都唔播？突然咁本土嘅？

2016立法會選舉之我見

1.    講啲感動嘢先。

a.    首先，向太古選民致敬。排到凌晨兩點幾，唔係講笑。見到咁多人（仲有其他一啲票站排到半夜嘅）為香港未來而堅持排隊，堅感動。

b.    有候選人公佈棄選，為大局作想，係成場選舉第一個感動位。可惜我嗰區（新界西）無人退，係非常令人遺憾嘅！

c.    我最感動嘅，係我爸爸媽媽喺我同佢哋講完電話之後，答我一句「OK」話會喺新西投某非建制候選人。雖然我無問最後佢哋係咪真係投咗畀嗰位候選人，但係呢個對我蒞講係最感動嘅。

2.    關於雷動：

a.    首先，我真心覺得雷動搞得好差。訊息、指示含糊，又唔夠人協調。好似九月三號晚分組討論，個facilitator都唔知做過乜，剩係識叫人投票揀嘢，完全唔理討論秩序。明明個時段討論超區，啲人入蒞就講新西，亂哂龍。好多人又唔明自己入得個組就已經係策略選民，雷霆救兵另計，但係又無人解釋。結果我自發做咗個facilitator，答人問題，糾正誤解，仲要出埋summary講投乜票結論係乜。大佬，搞得分組就搞好啲啦！

b.    再之後，係當晚遲咗出雷霆救兵嘅投票建議。雷動聲稱係因為系統受到攻擊，所以出遲咗。我唔評論係真定假，但係當晚的確令登記咗做救兵嘅人唔知點好，最後係自己決定點投算數。即係話，雷霆救兵呢部份嘅效果一定大打折扣。

c.    跟住講下啲人賴雷動累到一啲候選人失票。從結果蒞睇，我同意雷動唔算成功嘅。但係，要諗下點解唔成功。

d.    咁首先要明白雷動嘅理念係乜先。雷動計劃係一個對抗建制配票系統嘅嘗試，目的係令非建制盡量入局。成個計劃應該有個前設，就係會有基本盤，即所有選民會跟民調咁投票。然後雷動搵為數算少嘅「策略選民」去放棄個人喜惡去救邊緣候選人；最後仲有「雷霆救兵」，根據策略選民上報投咗嘅票（包括身邊親戚朋友），喺最後關頭集中火力救若干最危嘅候選人。根據雷動資料，總共有四萬幾人參加咗做策略選民。對比總投票人數，只係佔咗大約2%。

e.    再睇返現實背景。今屆選舉港大民調只係做到九月二號，而上屆有嘅即時票站調查結果今屆就無公佈。所以九月二號嘅民調，就成為咗主導所有選民同雷動嘅唯一數據。有人質疑港大民調抽樣得五千人咁細準唔準信唔信得過，但係數據就係得咁多，一係就唔信，一係就唔準都要信。我直覺覺得大部份人都選擇咗信。

f.      而無咗即時票站調查結果，事實上係好難做到配票。但係畀建制配票機器玩咗咁多次嘅非建制選民，喺傳媒渲染雷動計劃嘅「救人精神」之下，大家都好想反制呢個機器。個人認為，呢個諗法令好多本來嘅基本盤都變咗做救人mode，大家都只係睇民調就諗住去救人自己配票，完全唔跟雷動或者政黨配票建議（如民主黨超區配票策略）。我覺得呢個情況令基本盤出現偏差，進而亦令雷動無效化。Anyway，此乃後話。而搞笑嘅係，有唔少人無理到最新嘅民調，只係記住舊民調結果就去配票救人。（我點知？因為喺雷動新西群組討論嘅時候，唔少人一入蒞就話20號勢危要投20號囉。可想而知，唔少人啲嘢入咗腦係唔會去自行更新嘅。）

g.    （基於我係新西選民，以下我只可以以新西嘅角度去睇件事，但係應該都可以套落去其他區度啩…）根據九月二號港大民調加街頭民調再加雷動平台調查，新西嘅支持度分佈如下圖（建制攞六席，非建制只得三席）：

h.    所以九月三日晚雷動新西群組嘅討論就係，喺嗰四張選情危急區名單入面，揀邊兩張出蒞救。一輪投票之後，策略選民揀咗郭家麒同黃浩銘兩張名單蒞救。講真，從數據睇，我會揀郭家麒同李卓人，但係明顯策略選民對阿人有戒心，所以最後無揀佢。呢個係最後雷動喺新西無效嘅其中一個原因。

i.      雷動根據呢個策略選民嘅選擇，公佈嘅新西策略選民投票建議係：一半畀郭醫生，一半畀村長。

j.      新西比較特別嘅係，策略選民回報嘅真實投票情況，真係有跟到個投票建議。

 
       但係喺其他區，好多人（計埋身邊親朋戚友）係唔跟雷動建議嘅。

k.    去到九月四日晚，雷動遲咗出嘅雷霆救兵投票建議，新西係咁嘅。

       新西：因高投票率，修改原先決定，集中投票給李卓人，多爭一席。

l.      我望住呢個建議，覺得當時撐阿人已經太遲。照計救村長已經有難度，點再救阿人？所以我係無跟呢個建議，照投咗村長嘅。

m.   拎返新西結果蒞睇：

• 好多人都去咗救朱廸，令朱廸做咗票王。呢個同雷動無關，因為雷動無叫人投或者棄朱廸。反而證明啲人入哂救人mode，群眾意志超越配票，如上述2f點。

• 雷動叫人救醫生，醫生以第七位入局。

• 雷動叫人救村長，而村長落選。但係本來村長支持度係低過阿人，我覺得係策略選民一早揀錯營救對象，無得怨。

• 雷動叫救兵救阿人，一則實在太遲，二則亦係策略選民一早揀錯營救對象。同埋阿人落選，主因在於老馮唔退。

n.    又睇下超區：

• 雷動叫人平均分配畀逗號神同梁耀忠。

• 結果逗號神變咗票王，但係梁耀忠嘅票唔算太突出。咁好明顯唔關雷動事。

• 不但止雷動同逗號神變到票王無關，連白鴿黨自己嘅配票機制亦都無關，我覺得係群眾意志超越配票嘅另一例子。白鴿黨都要檢討下點解自己嘅配票機制無效，搞到阿涂咁狼狽。

o.    當然，喺其他區，雷動表面上係有啲用，例如港島。然而，基於雷動效應喺各區嘅表現唔一致，所以可以證明雷動並唔能夠充份影響到投票意向。亦因此，我覺得候選人落選或者陷入危急狀態，都唔可以賴雷動。畢竟，雷動只有四萬人參加，而當中有人係唔同意投票建議而自己投票嘅。

p.    咁雷動有咩得着？我覺得佢有份喚醒非建制支持者去自行配票囉。另外，呢次係第一次進行全港性非建制配票，以後可以再睇點樣做好啲（如果再做的話）。不過，個人希望唔係戴教授做囉（我始終覺得佢太學術化，做實際行動硬係差啲）。

3.    關於結果：

a.    老馮落選：你做乜嘢空降啫？上次選到超區唔係因為你本人，係大家守護非建制嘅成果。你個黨唔大，學乜人周圍選呢？累人累己。如果真係滅黨，真係自己攞蒞！

b.    亡國興落選：充份證明廣大選民對佢剪布嘅立場非常不滿，寧願要個喊包都唔想睇到佢拎金鉸剪數午餐肉。

c.    熱普城落選：佢哋都係自high咋嘛，教主國師黃上會繼續自我陶醉，唔使擔心。

d.    何君妖當選：無眼睇！最衰都係老馮！

e.    容律師當選：大家嫌鼠王芬同元秋仲未夠搞笑，要搵多個幫手係咪？

f.     九西全女班當選：（數學題）個墟，六個女人即係有幾多個墟呢？

4.    其他

a.    仲有好多嘢之後要大家跟進：身份證副本可以攞去投票，有人懷疑被冒名投票，有人無咗超區一票，投票系統同流程嘅改善…真係大把嘢要睇！

柒號候選人之東鐵線票價考

噚晚有位新界西立法會候選人想駁斥另一候選人關於西鐵線同東涌線比東鐵線貴嘅質疑（見上圖）。咁我哋即管蒞睇下呢位柒號候選人嘅反駁論據有幾合理先。

1.  柒號候選人話人哋計東鐵䤼只計紅磡至上水唔合理，要計埋羅湖至啱。其實佢知唔知好多人搭東鐵線嘅車程都係呢紅磡至上水之間嘅呢？
2. 柒號候選人於是就用現時紅磡往羅湖嘅車費計數，計出東鐵線沿途每公里收費其實貴過西鐵線同東涌線。柒號候選人又話自己以前有做九鐵，無理由唔知普通人士去羅湖嘅車費係包咗過境鐵路服務額外收費啩？如果要公平咁計，應該參考羅湖特價證嘅本地服務票價喎（截自：港鐵車費表 http://www.mtr.com.hk/archive/en/tickets/2016_Rail_Card_Control_Fares_Output_Version1.pdf）
   紅磡至上水成人八達通車費係$10.2，單程票車費係$11.0。用同樣比例推算，紅磡至羅湖嘅非過境單程票車費大約係$12.9，除返每公里係$0.31。即係話西鐵線依然係貴超過一倍，東涌線貴一點六倍添呀！咁睇另一候選人無大錯喎！
3. 有人幫柒號候選人兜，話羅湖過境鐵路收費補貼咗東鐵線車費（呢個源自九鐵年代嘅交叉補貼政策），所以先至咁平。咁點解只係補貼東鐵線，唔補貼埋西鐵線呢？唔係同一間公司（當年九鐵）蒞嘅咩？哦，另一候選人指出咗（https://www.facebook.com/dickpatheung/videos/1103298026402787/），當年柒號候選人做九鐵主席嘅時候呢，就定咗西鐵要獨立自己一盤數，要保持有6%的盈利率，亦要比巴士收費貴一成。哼，柒號候選人仲好意思話自己引入咗月票制度優惠市民，新界西嘅朋友真係睇清楚邊個係西鐵線車費貴嘅罪魁禍首先呀！
4. 好嘞，睇返柒號候選人嘅論點，佢反而話東鐵線貴啲，咁佢係咪贊成東鐵線要減返落去西鐵線嘅車費水平呢？又抑或佢其實想話過境鐵路服務收費過高，應該減價呢？甚至係覺得交叉補貼政策過時，要修改或者廢除呢？唔該柒號解釋下…

睇返2007年立法會交通事務委員會會議紀要（CB1/PL/TP/1，http://www.legco.gov.hk/yr06-07/chinese/panels/tp/minutes/tp070525.pdf），當年九鐵話「九鐵須依靠來自過境服務的收入來將本地服務的票價維持在低水平，後者的票價已有大概10年沒有上升」。睇返宜家，補貼依舊，票價就年年加，真係無奈。