拿宅放學FAQ：小朋友，你會唔會食飽飯游水？

（成日睇 #100毛 #放學FAQ ，都想試下問自己嘅小朋友，睇下佢哋會答乜。一於就試下，不定期跟問！）

小：小皇子（一年班）　　　拿：拿哈哈


拿：小朋友，如果有人叫你食飽飯之後去游水，你會唔會去游呀？
小：（毫不猶豫）唔會！
拿：點解呀？
小：（毫不猶豫）會嘔㗎！
拿：（咦，識喎）但係我哋特首話呢，喺中環返工嘅叔叔同姨姨呢，應該食飽飯就去維多利亞港游下水運動下喎…
小：（狂笑）（堅‧狂笑）（笑咗有卅秒）哈哈哈哈哈…維多利亞港？哈哈哈哈哈…
拿：係呀，特首真係咁講，咁你覺得點呢？
小：特首唔啱囉。
拿：（有見地！）咁可以點做？
小：話下佢囉！
拿：（大把人話過佢啦，佢肯聽至得㗎！）


* 以上小朋友之答案皆為真實對白。

Online News Typo 20160420

原來大家一直都嗌錯，其實佢係叫Mike，唔係Miki…

Online News Typo 20160418

簡體字版連名都幫人改埋，唔係幾得喎。咁大陸人落到蒞香港咪搵唔到用唔到蒞消費囉？嘩，簡真係對香港零售業嘅一大打擊呀！

還好正體字版無轉到…

Online News Typo 20160414

嘩，終於可以用八達通過錢畀朋友啦！方便好多㗎嘛！以後大家見我同朋友突然黐住埲牆拎住手機拍蒞拍去，千祈唔好驚奇，因為你哋都得㗎！

（唔好話我特登捉阿公報字蝨，生果報都係咁寫。嗯，阿公生果都係咁寫，一定係要黐住埲牆蒞用嘅！）

Online News Typo 20160411

點解警員撞車被困，會令到另外三架車相撞呢？係咪嗰三架車嘅司機八卦？定係個被困警員太樣衰？

Online News Typo 20160329

搞清楚先：咖啡因飲料唔等於咖啡因呀吓！

純咖啡因係白色粉末狀，唔係液體，所以無得直接話飲三杯咖啡因，點都要開水飲，不過開水飲已經算係咖啡因飲料。喺室溫下每100毫升水可以溶到2克純咖啡因，如果係滾水就每100毫升溶到66克。一個成年人如果一日攝取10克或以上嘅咖啡因就會致命，所以就當咖啡因飽和溶液唔算咖啡因飲料，記者先生／小姐如果用暖水沖三杯咖啡因飽和溶液出蒞飲恐怕就會一命嗚呼，唔駛再講咩流產率…

當然有人會話唔可以熔化純咖啡因蒞飲咩？純咖啡因熔點係235至238°C，我諗無人可以直接飲用咁熱嘅液體啩？

小醫生診症實錄

家中兩位小朋友在玩醫生玩具，這次妹妹做醫生，哥哥做護士，妹妹的毛公仔則做病人。不久，傳來以下醫生護士對話……

醫：我唔係叫你擘大個口呀，叫你擘大條脷呀！
護：但係佢無脷喎…
醫：咁擘大個口啦！
NHH：@_@!

有袋的鞋

某夜，我正在厨房洗碗碟，妹妹突然煞有介事的走到安全閘前，喊了我一聲……

妹妹：（指着自己腳上的那雙米妮老鼠保暖拖鞋）爸Ｂ，你睇下我隻Minnie拖鞋！佢有個袋可以裝隻腳㗎！
NHH：（咁即係點？即係著咗一隻腳落隻鞋度，另外仲有個袋裝多一隻腳？）@_@'''

我要健康‧我要燒脂…？

某日獨自到佳寧買日用品，正在店內貨架間搜尋之際，一位售貨員走近並向我遞上一張宣傳單張…

售：先生，介紹返呢隻產品，去油燒脂好有效…
拿：（一邊將單張遞返畀售貨員，一邊心諗：『你真係想sell我？』）我諗我唔需要啦。
售：（鍥而不捨）但係先生，宜家出街食嘢好多油好油膩…
拿：（笑住）我諗我真係唔需要啦，唔該哂。

其實佢點解會覺得我有需要呢類產品？係咪我肥咗？我係咪要減肥啦？

拿宅放學FAQ：小朋友，你覺得自己叻啲定叻哥叻啲？

（成日睇 #100毛 #放學FAQ ，都想試下問自己嘅小朋友，睇下佢哋會答乜。一於就試下，不定期跟問！）

小：小皇子（一年班）　　　拿：拿哈哈

拿：小朋友，你知唔知邊個係叻哥或者阿叻呀？
小：唔知。
拿：（播咗荷蘭叻唱《我至叻》嘅片段後）嗱，就係呢個伯伯嘞！係咪好核突呢？
小：係呀！
拿：咁你覺得你叻啲定佢叻啲？
小：佢叻啲。
拿：吓？典解呀？佢有咩咁叻呀？
小：佢話佢玻璃都變鑽石嘛！
拿：咁佢係咪真係變到先？
小：（搖頭）唔係。
拿：咁佢叻啲定你叻啲？
小：我叻啲，佢都只係個淨係識講嘢嘅伯伯咋嘛！
拿：（識講呢句已經足夠證明你叻過荷蘭叻！）如果聖誕老人會送以下其中一樣禮物畀阿叻，你覺得聖誕老人會送乜？A. 棉衲　B. 透明太空衣　C. 泳褲
小：泳褲。
拿：典解嘅？
小：等佢可以著蒞游水去搵啲玻璃變鑽石，然後拎返屋企做裝飾。
拿：咁佢應該游到死都唔會有嘢裝飾間屋囉…




＝＝＝＝＝

小：小公主（K1）　　　拿：拿哈哈

拿：小朋友，你知唔知邊個係阿叻呀？
小：LEGO囉！
拿：吓？叻哥定LEGO呀？
小：叻哥。
拿：咁你覺得你叻啲定佢叻啲？
小：佢叻啲。
拿：典解嘅？
小：佢鑽石變玻璃嘛！
拿：鑽石變玻璃？咁犀利？不過又係嘅，啲嘢經過叻哥手都真係鑽石都變玻璃呀！咁如果聖誕老人會送以下其中一樣禮物畀阿叻，你覺得聖誕老人會送乜？A. 棉被　B. 透明太空衣　C. 泳褲
小：B！
拿：典解嘅？係咪要送佢上太空呀？
小：（諗咗兩秒）唔係，係送A！
拿：咁又典解要送棉被呢？
小：（拎起手上本故事書）哈哈哈哈…（不了了之）



* 以上小朋友之答案皆為真實對白。

幻聽

　　呢排坐西鐵，都會聽到以下歌詞：

 🎼 我要我嘅兔仔 🎵 每日半天吊 🎶

　　咁好多時坐車我一係就瞓緊，一係就太迫人睇唔到個電視播緊乜。咁聽到呢兩句歌詞，我就會諗：『這是甚麼勞什子虐畜廣告？』點知聽多兩句，竟然有呢句：

🎵 兔仔HAPPY 🎶

　　Fine！一個願打一個願捱，我點估到會有隻被虐狂嘅兔仔啫？

　　終於有一次，我望到個電視，原來，係一個奶粉品牌廣告，仲可以跟住跳舞添㗎。OK，我認我耳仔一向唔靈……


延伸閱讀：
廣告原版MV | https://www.youtube.com/watch?v=zyU5ih6vYKA

Online News Typo 20151220

呢間七仔好生意喎！可能以後七仔都要有持槍警衛！

拿宅放學FAQ：小朋友，如果青馬大橋冧咗，你會點去機場？

（成日睇 #100毛 #放學FAQ ，都想試下問自己嘅小朋友，睇下佢哋會答乜。一於就試下，不定期跟問！）

小：小皇子（一年班）　　　拿：拿哈哈

拿：（拎住本《100毛》）小朋友…
小：又蒞？
拿：係呀！小朋友，如果青馬大橋冧咗，你會點去機場呀？
小：搭機鐵囉！
拿：但係機鐵都係行青馬大橋㗎喎…
小：（突然醒起狀）呀，係喎！
拿：咁你會點去機場呀？
小：（諗咗陣）唔知喎。
拿：畀你揀嘞：一係等第二條橋起好先，一係游水過去機場。
小：我會等第二條橋起好。
拿：咁要等好耐㗎喎！點解唔游水？
小：因為好多人都唔識游水嘛！
拿：（其實係你唔識游水咋嘛！）

* 以上小朋友之答案皆為真實對白。

假正經

周六晚上，晚飯之前，家中收到私人號碼來電……

NHH：（提起話筒，不作聲）……
（等了近十秒，對方依然沉默）
NHH：（準備收線，心想）又有人玩電話！
錄音女聲：（大概內容，無留心聽嘛！）您好！我哋做緊一個唔知咩調查……請放心，您嘅個人資料將會保密……請輸入您嘅年齡，然後撳井掣。
NHH：（先按「０」，後按「＃」）
錄音女聲：唔好意思，您唔乎合我哋嘅調查對象資格。多謝您參與正經研究嘅民意調查，再見。
NHH：（心想）我唔正經你都知道，勁喎！Why so serious?

拿宅放學FAQ：小朋友，你覺得點先可以做副校長？

（成日睇 #100毛 #放學FAQ ，都想試下問自己嘅小朋友，睇下佢哋會答乜。一於就試下，不定期跟問！）

小：小皇子（一年班）　　　拿：拿哈哈

拿：小朋友，你覺得點先可以做副校長？
小：嗯…應該要讀好多書。
拿：咁使唔使讀到博士呀？
小：嗯…我諗都唔使嘅！
拿：（世事都畀你看透了）咁如果有個人跌低咗，你會唔會問候佢呀？
小：都會嘅。
拿：咁如果嗰個人係扮跌嘅呢？你仲會唔會問候佢呀？
小：唔會啦！
拿：典解嘅？
小：佢扮㗎嘛！咪唔使理佢，尤得佢囉！
拿：（叻仔！）

* 以上小朋友之答案皆為真實對白。

拿宅放學FAQ：小朋友，你會買HB鉛筆定買蘋果筆？

（成日睇 #100毛 #放學FAQ ，都想試下問自己嘅小朋友，睇下佢哋會答乜。一於就試下，不定期跟問！）

小：小皇子　拿：拿哈哈

拿：小朋友，你會買兩蚊嘅HB鉛筆定買一千蚊嘅蘋果筆？
小：梗係買鉛筆啦！
拿：（啱嘞！）咁你知唔知邊個係喬布斯呢？
小：喬布斯？呃…我知邊個係喬寶寶！
拿：（你又知？）咁你會唔會用八千幾蚊買部埃瘋？
小：買囉！
拿：（哎丫，之前讚壞你添！）典解嘅？
小：八千幾蚊，唔貴啦！呃…貴唔算貴，平唔算平，買啦！
拿：（衰仔！食米唔知米貴呀！）

* 以上小朋友之答案皆為真實對白。

小別

從上海回來，早上才跟剛起床的妹妹相見。我抱起妹妹親了親……

NHH：妹妹有無掛住爸Ｂ呀？
妹妹：……
NHH：係咪無掛住呢？
妹妹：（想了想）係呀，淨係起咗身坐喺床度咋！
NHH：@_@;;;

給吾兒──六週歲紀念

　　這麼快你就幼稚園畢業了！為此感到高興之餘，也實在不捨。我還想跟現在的你多相處啊！

　　這年來你的好奇心越發旺盛，同時也越來越多邏輯思考。見到新奇的事物，你一定會問那是甚麼或為甚麼，並努力的去理解和消化，繼而把新事物和以前所知的串聯起來。當然再加上天馬行空的想像力，你總會創造出一些古怪的事物出來，叫人啼笑皆非。你認真思考的表情也挺可愛的，可有時想得太專心，忽略了身邊的人和事，這要小心點啊。

　　你對有數字的東西都特別有興趣。時鐘、電梯、溫度計、價錢牌、食物包裝上的容量、下一班列車的時間……你看見了都會留意一番甚至細心研究。最近你還喜歡看香港地圖，經常把地圖翻來翻去，計劃你的暑假冒險之旅的行程，更把地鐵沿線的地方都翻閱了不知多少遍，而且連相鄰地鐵站的行車時間都記住了（也是數字啊）。你對數字的敏感度和對應的記憶力還真是不能小覷！這些是你其中的一些專長和「資產」，要好好利用啊！

　　你的笑點特別低，人家說話發錯音，路上一下怪聲、一個表情、一個動作，都可以令你捧腹大笑（也因此給我取笑你是「傻仔」）。這也好，容易笑，人也應該會樂觀開心點，壓力也不會太大了。

　　這年和你一起選小學，幸運地選上了你心儀的學校。學校離家遠了一點，爸Ｂ其實心裏有點擔心你坐長途校車會否難適應（爸Ｂ從來都是用腳走回中小學的）。不過坐校車始終是一種經歷、一個和其他同學交流的空間，日後應該會成為你的童年回憶的重要部份吧？

　　下月起你就開始小學生涯，揭開你人生的新一章了，你應該也滿是期待的吧？爸Ｂ媽咪都會和你一起打拼的！祝你萬事順順利利，快樂無憂，健康幸福。

Online News Typo 20150808

910000（公）噸嘅貨機？飛唔飛得起㗎？吹得起都真係好大風喎！大吉利是講句，假如真有如此飛機，墜機的話可能會有撞擊坑喎…

（當今世上最大起飛重量的飛機為烏克蘭擁有的安托諾夫An-225「夢想式」運輸機，淨機重175公噸，最大起飛重量為640公噸。而可運作最大推力火箭為美國的農神五號火箭，淨重約3000公噸，可負載119公噸至近地軌道。）

城堡

（那天在迪士尼樂園內，在范特西蘭站等火車時，有一操普通話男子拿着樂園指南向車站職員查詢……）

男子：（指着樂園指南）這個在哪兒？
職員：這個在城堡旁邊。
男子：（惘然）城堡？哪一個城堡呀？
職員：（有點無奈有點沒好氣）這裏只有一個城堡呀……

（當時適宜播放：🎶🎵你這霎戇在何方~~~我個雪櫃在厨房~~~🎵🎶）