拿宅放學FAQ：小朋友，知唔知新出咗個中國超人呀？

（成日睇 #100毛 #放學FAQ ，都想試下問自己嘅小朋友，睇下佢哋會答乜。一於就試下，不定期跟問！）

小：小皇子（一年班）　　　拿：拿哈哈

拿：小朋友，知唔知新出咗個中國超人呀？
小：唔知。
拿：咁你估下中國超人係咩樣嘅？
小：佢應該係成身紅色，塊面都係紅色，耳仔掛住耳環。
拿：（關公嘅親戚呀？）等我摷中國超人個樣畀你睇下先…真係著紅色衫㗎喎…
小：（睇完之後）哦…
拿：咁你覺得中國超人有咩絕招呢？
小：佢無絕招㗎！
拿：吓？無絕招？咁佢負責做乜㗎？
小：佢負責企喺度。
拿：淨係企喺度？
小：佢負責看守，然後等其他超人打啲目標。
拿：咁佢唔使打咁好呀？
小：佢看守同埋指揮其他超人打。
拿：（你都幾知國情咁喎）咁係咪即係睇得唔打得？
小：（諗咗陣）都唔係嘅，有需要都可以打少少嘅。
拿：但係你又話佢無絕招，點打呀？
小：好似普通人咁打。
拿：……（咁點叫超人呀？）

* 以上小朋友之答案皆為真實對白。